HIDUP Palui matan bahari sampai wayah ini tatap kada parnah baubah, bilang pas-pasan tarus. Napa haja usaha gasan maubah nasib digawinya, matan bahuma manggawiakan ampun urang, bajualan pancarikinan, bajualan pacah balah, sampai wayah ini inya bagawi maujek. Sapida muturnya nang dipakainya maujek itu pun sapida mutur bakas, sudah karancaian wan rancak pamugukan.
Tapi kada lawas tadi tahabar Palui garing dan kada kawa lagi maujek. Ulih bininya si Palui dibawa ka rumah sakit lalu Palui disuruh upname. Imbah dipariksa, lalu dukter baucap:
"Baiknya Abahnya ini diuperasi haja," ujar dukter manyaranakan.
"Apakah kada kawa diubati haja duk?" ujar bini Palui.
"Kalu kawa dibuati haja duk ai, kasihan Palui kalu sampai awaknya disayat-sayat," ujar Garbus wan Tulamak wayah mailangi.
"Kasihan banar kalu kada diuperasi, jangankan maninjak mahidupi sapida mutur, maangkat banyu saember haja inya kada kawa," ujar dukter manajalasakan.
"Napa panyakit si Palui itu?" ujar Garbus babisik wan bini Palui.
"Panyakitnya nang handak diuperasi wan diputung itu adalah kasayanganku salawas ini, guliminganku," ujar bini Palui.
"Aku kada paham, panyakit napa nang kasayangan bini Palui itu. Kalu panyakit kada parlu disayangi dan harus diubati atawa diuperasi sasuai saran dukter tadi," ujar Tulamak balum paham.
"Aku sayang banar, aku sayang banar, karna di samping nyaman diguliming bahanu rasa manindih-nindih wan kalipakan manapuk-napuk" ujar bini Palui pina sadih banar.
"Duk, umpat batakunlah, napa panyakit Palui itu maka harus diuperasi?" ujar Garbus batakun wan dukternya.
"Panyakitnya adalah... hernia alias burut," ujar dukter babisik.
"Ooo ... pantas haja bini Palui sadih banar , karna panyakit itu umpat jua manyamani," ujar Garbus wan Tulamak paham rupanya panyakit burut Palui itulah maka Palui laki bini salawas ini pina masra dan basasayangan tatarusan. (ivd/mht)
0 comments:
Post a Comment